🌿 នៅថ្ងៃទី ២៣-២៤ ខែមេសា ឆ្នាំ២០២៦ គម្រោង CamAdapt ក្រោមការដឹកនាំរបស់ក្រសួងបរិស្ថាន បានរៀបចំវគ្គបណ្ដុះបណ្ដាលស្ដីពី «ការប្រែប្រួលអាកាសធាតុ និងការបញ្ជ្រាបយេនឌ័រ សម្រាប់ថ្នាក់ក្រោមជាតិ និងសហគមន៍នៅតំបន់ឆ្នេរ» ដោយមានការអញ្ជើញចូលរួម ពី ឯកឧត្តម កូប រ៉លី អនុរដ្ឋលេខាធិការ នៃក្រសួងបរិស្ថាន លោកឡុង សូណា ប្រធាននាយកដ្ឋានប្រែប្រួលអាកាសធាតុ មន្ត្រីជំនាញនាយកដ្នានតំបន់ការពារធម្នជាតិ តំណាងរដ្ឋបាលខេត្ត សហគមន៍តំបន់ឆ្នេរ អាជ្ញាធរថ្នាក់ក្រោមជាតិនិងក្រុមយុវជន និងអ្នកពាក់ព័ន្ធសរុបប្រមាណ ៤០ នាក់ (ក្នុងនោះមានស្ត្រី ២៣ នាក់)។

វគ្គបណ្ដុះបណ្ដាលនេះមានគោលបំណងពង្រឹងការយល់ដឹង និងការអនុវត្តអំពីសារៈសំខាន់នៃការបញ្ជ្រាបយេនឌ័រ ក្នុងវិស័យបរិស្ថាន និងការឆ្លើយតបទៅនឹងការប្រែប្រួលអាកាសធាតុ ជាពិសេសនៅថ្នាក់ក្រោមជាតិ និងសហគមន៍មូលដ្ឋាននៅតំបន់ឆ្នេរ។ សកម្មភាពនេះបានរួមចំណែកគាំទ្រដល់អាទិភាពជាតិ ក្នុងការពង្រឹងភាពធន់នឹងអាកាសធាតុ និងលើកកម្ពស់សមត្ថភាពសហគមន៍ក្នុងការបន្ស៊ាំ និងឆ្លើយតបទៅនឹងផលប៉ះពាល់នៃការប្រែប្រួលអាកាសធាតុ។

ក្នុងវគ្គពិភាក្សា អ្នកចូលរួមបានយល់ដឹង និងចែករំលែកអំពីវិធានការឆ្លើយតបទៅនឹងការប្រែប្រួលអាកាសធាតុ ទាំងផ្នែកបន្ស៊ាំ និងការកាត់បន្ថយ ដើម្បីអាចយកទៅអនុវត្តក្នុងការគ្រប់គ្រង និងអភិរក្សធនធានធម្មជាតិឱ្យមានប្រសិទ្ធភាព តម្លាភាព និងចីរភាព។ ជាលទ្ធផលរួម វគ្គបណ្ដុះបណ្ដាលនេះបានពង្រឹងការបញ្ចូលការពិចារណាលើយេនឌ័រ ទៅក្នុងផែនការគ្រប់គ្រងសហគមន៍តំបន់ការពារធម្មជាតិ (CPAMP) ផែនការគ្រប់គ្រងសហគមន៍នេសាទ​(CFAMP) ផែនការអភិវឌ្ឍន៍ និងផែនការវិនិយោគឃុំ–សង្កាត់ ព្រមទាំងលើកកម្ពស់សមត្ថភាពក្នុងការអនុវត្ត និងតាមដានសកម្មភាពនៅថ្នាក់មូលដ្ឋាន។

🌱 គម្រោង CamAdapt ដែលអនុវត្តដោយអគ្គនាយកដ្ឋានតំបន់ការពារធម្មជាតិ នៃក្រសួងបរិស្ថាន និងរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ ដោយទទួលការគាំទ្រថវិកាពីមូលនិធិបរិស្ថានសកល (GEF) តាមរយៈអង្គការស្បៀង និងកសិកម្មសហប្រជាជាតិ (FAO) មានគោលបំណងកាត់បន្ថយភាពងាយរងគ្រោះរបស់សហគមន៍នេសាទតាមឆ្នេរ និងពង្រឹងការបន្ស៊ាំនឹងការប្រែប្រួលអាកាសធាតុ តាមរយៈការពង្រឹងប្រព័ន្ធអេកូឡូស៊ី និងលើកកម្ពស់ជីវភាពរស់នៅប្រចាំថ្ងៃរបស់សហគមន៍។