ព័ត៌មានបន្ថែមអំពី ការប្រែប្រួលអាកាសធាតុ
ប្រទេសកម្ពុជាងាយរងគ្រោះខ្ពស់ទៅនឹងការប្រែប្រួលអាកាសធាតុ ដែលចាត់ថ្នាក់ជាក្នុងចំណោមប្រទេសងាយរងគ្រោះខ្ពស់ទាំង១២លើសាកលលោក។ ប្រទេសកម្ពុជាប្រឈមនឹងគ្រោះមហន្តរាយញឹកញាប់នឹងធ្ងន់ធ្ងរ ដូចមានបង្ហាញខាងក្រោម៖
- គ្រោះរាំងស្ងួតឆ្នាំ២០០២ ប៉ះពាល់លើប្រជាជនកម្ពុជាច្រើនជាង២លាននាក់ក្នុងខេត្តចំនួន៨ ដែលបង្កផលលំបាកដល់មុខរបរចិញ្ចឹមជីវិតរបស់ប្រជាជន។
- ការបាត់បង់និងការខូចខាតបង្កដោយព្យុះទីហ្វុងកេតស៊ីណាត្រូវបានព្យាករណ៍ថាមានចំនួនប្រមាណ១៣២លានដុល្លាអាមេរិក និងការបាត់បង់ជិវិតចំនួន៤៣នាក់
- យោងលើកម្រងទិន្នន័យគ្រោះមហន្តរាយអន្តរជាតិ គ្រោះមហន្តរាយធម្មជាតិក្នុងឆ្នាំ២០១១ បង្ហាញថាការបាត់បង់តម្លៃសេដ្ឋកិច្ចកម្ពុជាប្រហែល៤,៣%នៃផលលិតផលក្នុងស្រុកសារុប
- គ្រោះទឹកជំនន់ដ៏ខ្លាំនៅឆ្នាំ២០១៣ប៉ះពាល់ប្រជាជនចំនួន១,៨លាននាក់ក្នុងខេត្តចំនួន២០របស់កម្ពុជា ដែលមានតម្លៃបាត់បង់និងខូចខាតសារុបចំនួន៣៥៦,៣លានដុល្លាអាមេរិក
- បាតុភូតរលកកម្តៅឆ្នាំ២០១៦ ប៉ះពាល់យ៉ាងប្រាកដលើការផ្គត់ផ្គង់ទឹក សកម្មភាពកសិកម្ម និងការចិញ្ចឹមសត្វក្នុងជាច្រើនរបស់ប្រទេសកម្ពុជា។
បញ្ហាប្រែប្រួលអាកាសធាតុបង្កនូវបញ្ហាប្រឈមដ៏ចម្បងដល់កិច្ចប្រឹងប្រែងអភិវឌ្ឍជាតិក្នុងព្រះរាជាណាចក្រកម្ពុជា លើវិស័យសំខាន់ៗដូចជា៖
១. សន្តិសុខស្បៀង៖ ការផ្លាស់ប្តូររដូវក្រោមការប្រែប្រួលអាកាសធាតុនិងភាវរូបអាកាសធាតុបង្កនូវភាពរំខានដល់ពេលវេលាដាំដុះដំណាំរបស់កសិករខ្នាតតូច។ ការឆាប់មកដល់នូវរដូវភ្លៀងនាំភាពច្រលំដល់កសិករឱ្យឆាប់សាបស្រូវ ដែលចុងក្រោយផ្តល់នូវភាពបរាជ័យដំណាំ។ ព្រឹត្តិការណ៍មិនប្រក្រតីដូចជាទឹកជំនន់ និង គ្រោះរាំងស្ងួតដែលចំណោល(ព្យាករណ៍)ថានឹងកើនឡើងកាន់តែញឹកញាប់និងកាន់តែខ្លាំង ដែលបង្កនូវផលប៉ះពាល់ដល់សន្តិសុខស្បៀងក្នុងព្រះរាជាណាចក្រកម្ពុជា។
២. ផលិតកម្មកសិកម្ម៖ ផលប៉ះពាល់របស់ការប្រែប្រួលអាកាសធាតុលើវិស័យកសិកម្មបង្កជាបញ្ហាពិសេសដល់ ប្រទេសកម្ពុជា ពីព្រោះប្រជាជនភាគច្រើនមានមុខរបរពឹងអាស្រ័យលើកសិកម្មខ្នាតតូចនិងកម្រិតគ្រួសារ ដើម្បីចិញ្ចឹមជីវិត ហើយវិស័យកសិកម្មរួមចំណែកដល់ឆ្អឹងខ្នងសេដ្ឋកិច្ចកម្ពុជា។ សកម្មភាពកសិកម្មនៅកម្ពុជាភាគច្រើនពឹងអាស្រ័យលើរបបទឹកភ្លៀង ដែលកំពង់ទទួលកំណើនភាពងាយរងគ្រោះក្រោមការប្រែប្រួលអាកាសធាតុ។ យើងបានជួបប្រទះនូវគ្រោះទឹកជំនន់និងរាំងស្ងួតដ៏ខ្លាំង ដែលបង្កនូវការបាត់បង់ផលិភាពកសិកម្មយ៉ាងច្រើន។
៣. គោលដៅអភិវឌ្ឍន៍ជាតិ៖ ផលិភាពកសិកម្មរំពឹងថានឹងកើនឡើងចន្លោះ ៣៥% ដើម្បីត្រូវនឹងគោលដៅកំណើនផលលិតផលក្នុងស្រុកសារុប។ ការប្រែប្រួលអាកាសធាតុបង្កនូវហានិភ័យដ៏ចំបងក្នុងការសម្រេចបាននូវគោលដៅអភិវឌ្ឍន៍ជាតិ ដោយសារតែផលប៉ះពាល់ពីគ្រោះរាំងស្ងួត ទឹកជំនន់ សត្វល្អិត និងការរាលត្បាតជំងឺ ដែលប្រហែលជាប៉ះពាល់ដល់ផលិតភាពកសិកម្ម។ កំណើនផលលិតភាពស្រូវ ដែលជាអាហារចំបងរបស់កម្ពុជានិងតម្រូវកំណើនស្រូវសម្រាប់ការនាំចេញ នឹងប៉ះពាល់ដោយការប្រែប្រួលអាកាសធាតុ។ វិស័យជលផលដែលផ្តល់នូវការចិញ្ចឹមជីវិតនិងឱកាសការងារដល់ប្រជាជនជាច្រើននឹងទទួលនូវផលប៉ះពាល់ផលផងដែរ។
៤. សុខភាពសាធារណៈ៖ ការផ្ទុះឡើងនៃជំងឺមួយចំនួនដូចជាជំងឺគ្រុនចាញ់និងជំងឺគ្រុនឈាមដែលទាក់ទងទៅនឹងការប្រែប្រួលអាកាសធាតុនឹងបង្កបញ្ហាប្រឈមយ៉ាងធំធេងដល់ប្រទេសកម្ពុជា។ ស្រដៀងគ្នានេះដែរ អនាម័យនិងការបំពុលទឹកសាប ឧ.ក្នុងអំឡុងពេលមានព្រឹត្តិការណ៍ទឹកជំនន់ នឹងបង្កនូវកំណើនអត្រារជំងឺអាសន្នរោគនិងជំងឺផ្សេងៗទៀតបង្កដោយទឹក។
៥. ហេដ្ឋារចនាសម្ព័ន្ធរូបវ័ន្ត៖ គុណភាពនៃហេដ្ឋារចនាសម្ព័ន្ធបច្ចុប្បន្នមិនត្រូវបានរចនាឡើងដើម្បីធន់នឹងកម្រិតខ្លាំងនៃផលប៉ះពាល់ពីការប្រែប្រួលអាកាសធាតុដែលយើងកំពុងជួបប្រទះសព្វថ្ងៃ។ យើងបានឃើញនូវការខូចខាតបង្កមកពីការជន់លិចផ្លូវថ្នល់ ប្រព័ន្ធបង្ហូរទឹក ប្រព័ន្ធប្រព័ន្ធធារាសាស្រ្ត និងហេដ្ឋារចនាសម្ព័ន្ធតភ្ជាប់ផ្សេងទៀតដូចជាស្ពាននិងលូទឹកជាដើម។ នៅក្រោមកម្រិតភ្លៀងធ្លាក់ខ្លាំងនិងទឹកជំនន់ ទំនប់និងជម្រាលផ្លូវត្រូវរងការខូចខាតដោយសំណឹកទឹក បង្កឱ្យប្រព័ន្ធផ្លូវថ្នល់របស់យើងមិនអាចឆ្លងកាត់បាន ហើយក្នុងរយៈពេលយូរវាបង្កនូវការបាត់បង់តម្លៃសេដ្ឋកិច្ចដល់ប្រទេស។ បញ្ហាទាំងនេះនឹងកាន់តែអាក្រក់ឡើងក្រោមការព្យាកណ៍ផលប៉ះពាល់អាកាសធាតុអនាគតដែលព្រឹត្តិកាណ៍ធ្ងន់ធ្ងរកាន់តែខ្លាំងនិងកាន់តែញឹកញាប់។ ប្រព័ន្ធផ្លូវថ្នល់ដែលជាផ្នែកសំខាន់មួយនៃការអភិវឌ្ឍសេដ្ឋកិច្ចរបស់ប្រទេស ក្នុងការសម្រួលដល់ចលនាប្រជាជន និងលំហូរទំនិញនិងសេវាកម្មទាំងក្នុងប្រទេសនិងក្នុងតំបន់អាស៊ាននឹងរងផលប៉ះពាល់ពីការប្រែប្រួលអាកាសធាតុ។
អាណត្តិ
នាយកដ្ឋានប្រែប្រួលអាកាសធាតុ ទទួលបន្ទុកលើកការសម្របសម្រួលនិងអនុវត្តលិខិតបទដ្ឋានគតិយុត្ត គោលនយោបាយ ផែនការយុទ្ធសាស្រ្ត ផែនការសកម្មភាព កម្មវិធី និងគម្រោងនានា សម្រាប់កាត់បន្ថយការបញ្ចេញឧស្ម័នផ្ទះកញ្ចក់ និងបន្ស៊ាំនឹងការប្រែប្រួលអាកាសធាតុ ព្រមទាំងពិនិត្យ តាមដាន វាយតម្លៃ និងធ្វើរបាយការណ៍ជាប្រចាំ។
តួនាទីរបស់នាយកដ្ឋានមានដូចជា៖
- រៀបចំសេចក្តីព្រាងលិខិតបទដ្ឋានគតិយុត្ត គោនយោបាយ ផែនការយុទ្ធសាស្រ្ត ផែនការនិងថវិកា លើកស្ទួយកិច្ចសហការជាមួយអ្នកពាក់ព័ន្ធ កសាងសមត្ថភាពមន្ត្រីនាយកដ្ឋាន គ្រប់គ្រងហិរញ្ញវត្ថុ អង្កេតតាមដានការងារផ្ធៃក្នុង និងគ្រប់គ្រងការងាររដ្ឋាបាលនានា ដែលពាក់ព័ន្ធនឹងតួនាទីនិងភារកិច្ចរបស់នាយកដ្ឋាន
- សម្របសម្រួលនិងអនុវត្តលិខិតបទដ្ឋានគតិយុត្ត គោលនយោបាយ ផែនការយុទ្ធសាស្រ្ត ផែនការសកម្មភាព កម្មវិធី និងគម្រោងនានា សម្រាប់កាត់បន្ថយការបញ្ចេញឧស្ម័នផ្ទះកញ្ចក់ និងបន្ស៊ាំនឹងការប្រែប្រួលអាកាសធាតុ ព្រមទាំងពិនិត្យ តាមដាន វាយតម្លៃ និងធ្វើរបាយការណ៍ជាប្រចាំ
- សម្របសម្រួលការរៀបចំនិងគ្រប់គ្រងសារពើភ័ណ្ឌឧស្ម័នផ្ទះកញ្ចក់ របាយការណ៍ជាតិ និងការអនុវត្តកាតព្វកិច្ចនានារបស់រាជរដ្ឋាភិបាល នៅក្រោមអនុសញ្ញាក្របខណ្ឌសហប្រជាជាតិស្តីពីការប្រែប្រួលអាកាសធាតុ
- សម្របសម្រួលផ្តល់ការគាំទ្របច្ចេកទេសក្នុងការធ្វើសារពើភ័ណ្ឌឧស្ម័នផ្ទះកញ្ចក់នៅតាមប្រភពបញ្ចេញនានា
- សម្របសម្រួលការវាយតម្លៃអំពីហានិភ័យ និងកាលានុវត្តភាពនានា ពាក់ព័ន្ធនឹងការប្រែប្រួលអាកាសធាតុ
- ពង្រឹងភាពជាដៃគូនិងកិច្ចសហប្រតិបត្តិការអន្តរជាតិ ដើម្បីកៀរគរធនទានសម្រាប់ឆ្លើយតបនឹងការប្រែប្រួលអាកាសធាតុ
- លើកសំណើបង្កើននិងគ្រប់គ្រងមូលនិធិ ដើម្បីគាំទ្រដល់ការអនុវត្តគោលនយោបាយឆ្លើយតបនឹងការប្រែប្រួលអាកាសធាតុ
- រៀបចំបង្កើតនិងគ្រប់គ្រងប្រព័ន្ធព័ត៌មាននិងចំណេះដឹងស្តីពីការប្រែប្រួលអាកាសធាតុ
- ផ្សព្វផ្សាយវិធានការឆ្លើយតបនឹងការប្រែប្រួលអាកាសធាតុរបស់រាជរដ្ឋាភិបាល ជូនដល់សាធារណជន ដៃគូអភិវឌ្ឍន៍ និងសហគមន៍អន្តរជាតិ
- បំពេញភារកិច្ចជាស្ថាប័នបង្គោលជាតិនៃអនុសញ្ញា ពិធីសារ និងកិច្ចព្រមព្រៀងអន្តរជាតិពាក់ព័ន្ធនឹងការប្រែប្រួលអាកាសធាតុ
- សម្របសម្រួលការងារជាមួយមន្ត្រីបង្គោលនៅតាមបណ្តាលក្រសួង ស្ថាប័នពាក់ព័ន្ធ សម្រាប់ការងារប្រែប្រួលអាកាសធាតុ
- រៀបចំរបាយការណ៍ប្រចាំខែ ត្រីមាស ឆមាស នព្វមាស និងប្រចាំឆ្នាំ។
កាលប្រវត្ដិនៃកិច្ចប្រឹងប្រែងរបស់កម្ពុជាដើម្បីដោះស្រាយការប្រែប្រួលអាកាសធាតុ
ប្រទេសកម្ពុជាបានផ្តល់សច្ចាប័នលើអនុសញ្ញាក្របខ័ណ្ឌសហប្រជាជាតិស្តីពីការប្រែប្រួលអាកាសធាតុ (UNFCCC) នៅថ្ងៃទី ១៨ ខែធ្នូឆ្នាំ ១៩៩៥។ អនុសញ្ញានេះបានចូលជាធរមានសម្រាប់ប្រទេសកម្ពុជានៅថ្ងៃទី ១៧ ខែមីនាឆ្នាំ ១៩៩៦។
កម្ពុជាបានចាប់ផ្តើមគម្រោងលើកដំបូងដែលទាក់ទងនឹងការប្រែប្រួលអាកាសធាតុនៅក្នុងឆ្នាំ ១៩៩៩ដែលមានឈ្មោះថា “កសាងសមត្ថភាពកម្ពុជាដើម្បីរៀបចំរបាយការណ៍ជាតិលើកទី១ ស្តីពីការប្រែប្រួលអាកាសធាតុ” (CCEAP) ។ គម្រោងនេះត្រូវបានអនុវត្តដោយក្រសួងបរិស្ថាន ក្រោមការគាំទ្រពីកម្មវិធីអភិវឌ្ឍន៍សហប្រជាជាតិ (UNDP) និងមូលនិធិបរិស្ថានពិភពលោក (GEF)។ គម្រោងនេះមានរយៈពេលបីឆ្នាំ ដែលមានគោលបំណងរៀបចំរបាយការណ៍ជាតិលើកទី១របស់កម្ពុជា ផ្ញើទៅកាន់អនុសញ្ញាក្របខ័ណ្ឌសហប្រជាជាតិស្តីពីការប្រែប្រួលអាកាសធាតុ។ គម្រោងនេះ ត្រូវបានចាត់ទុកជាជំហានទីមួយរបស់រាជរដ្ឋាភិបាលក្នុងការអនុវត្តជាក់ស្តែងនូវអនុសញ្ញាស្តីពីការប្រែប្រួលអាកាសធាតុនៅកម្ពុជា។ គម្រោងនេះបានជួយប្រទេសក្នុងការកសាងសមត្ថភាពបច្ចេកទេស និងផ្នែកស្ថាប័នប្រែប្រួលអាកាសធាតុ និងបានជួយលើកកម្ពស់ចំណេះដឹងប្រែប្រួលអាកាសធាតុសម្រាប់ស្ថាប័ន និងបុគ្គល ចាប់ពីថ្នាក់មូលដ្ឋានរហូតដល់ថ្នាក់ដឹកនាំនយោបាយជាន់ខ្ពស់។
គម្រោងនេះបានបន្តក្នុងដំណាក់កាលទី២ រយៈពេល ១ឆ្នាំ ក្នុងឆ្នាំ២០០២។ ដំណាក់កាលនេះ បានជួយឱ្យប្រទេសអាចបន្ត និងពង្រឹងសមត្ថភាពប្រែប្រួលអាកាសធាតុដោយផ្តោតលើការកែលម្អសកម្មភាពនានា ដែលទាក់ទងនឹងកែលំអទិន្នន័យ និងមេគុណបញ្ចេញឧស្ម័នពីការប្រែប្រួលការប្រើប្រាស់ដី និងវិស័យព្រៃឈើ និងកសិកម្ម។ សកម្មភាពទាំងនេះ ត្រូវបានជ្រើសរើសមកអនុវត្ត ដោយសារភាពចាំបាច់នៃវិស័យទាំងនេះក្នុងបរិបទអភិវឌ្ឍន៍សេដ្ឋកិច្ច និងការបញ្ចេញ/ការស្រូបឧស្ម័នផ្ទះកញ្ចក់។
ខែសីហា ឆ្នាំ២០០២ ឯកឧត្តមរដ្ឋមន្ត្រីក្រសួងបរិស្ថាន បានដើរតួនាទីជាជនបង្គោលថ្នាក់ជាតិនៃអនុសញ្ញាក្របខ័ណ្ឌសហប្រជាជាតិស្តីការប្រែប្រួលអាកាសធាតុ។ នៅប្រទេសកម្ពុជាមានតែអនុសញ្ញាបរិស្ថានអន្តរជាតិនេះតែមួយគត់ ដែលមានជនបង្គោលថ្នាក់រដ្ឋមន្ត្រី ដែលបានបញ្ជាក់ពីការទទួលស្គាល់នូវភាពចាំបាច់ និងឆន្ទៈដោះស្រាយបញ្ហាប្រែប្រួលអាកាសធាតុ។
ខែមិថុនា ឆ្នាំ២០០៣ ក្រសួងបរិស្ថានបានបង្កើតការិយាល័យប្រែប្រួលអាកាសធាតុកម្ពុជា (CCCO) ដោយប្រកាសលេខ ១៩៥ ចុះថ្ងៃទី២៣ ខែមិថុនា ឆ្នាំ២០០៣។ ការិយាល័យនេះ ទទួលខុសត្រូវរាល់សកម្មភាពទាក់ទងនឹងការប្រែប្រួលអាកាសធាតុ។
ខែធ្នូ ឆ្នាំ២០០២ ក្រសួងបរិស្ថាន និង មជ្ឈមណ្ឌលរបស់កម្មវិធីបរិស្ថានសហប្រជាជាតិ (UNEP Risoe) ស្តីពីថាមពលអាកាសធាតុ និងការអភិវឌ្ឍដោយចីរភាព បានចុះហត្ថលេខាលើកិច្ចព្រមព្រៀងអនុវត្តគម្រោងជំហានទី១ “ការអភិវឌ្ឍសមត្ថភាពសម្រាប់យន្តការអភិវឌ្ឍន៍ស្អាត (CD4CDM)” ដែលបានបញ្ចប់ដោយជោគជ័យក្នុងខែមេសា ឆ្នាំ២០០៣។ គម្រោងនេះ បានទទួលការគាំទ្រផ្នែកហិរញ្ញវត្ថុដោយក្រសួងការបរទេសប្រទេសហូឡង់ តាមរយៈកម្មវិធីបរិស្ថានអង្គការសហប្រជាជាតិ (UNEP)។ បន្ទាប់មកការិយាល័យបានចាប់ផ្តើមអនុវត្តគម្រោង CD4CDM ដំណាក់កាលទី២ ក្នុងខែកក្កដា ឆ្នាំ២០០៣ រហូត ខែធ្នូ ឆ្នាំ២០០៥។ គោលបំណងរួមនៃកម្មវិធីនេះ គឺដើម្បីបង្កើនការយល់ដឹងឱ្យកាន់តែទូលំទូលាយ និងអភិវឌ្ឍសមត្ថភាពស្ថាប័ន ធនធានមនុស្សក្នុងប្រទេសកំពុងអភិវឌ្ឍ ដើម្បីចូលរួមពេញលេញក្នុងដៃគូស្មើភាពជាមួយនឹងបណ្តាប្រទេសអភិវឌ្ឍ ក្នុងការបង្កើត និងអនុវត្តយន្តការអភិវឌ្ឍន៍ស្អាត (CDM)។ កម្មវិធីនេះ ត្រូវបានអនុវត្តដោយអង្គការ URC សម្រាប់UNEP ដែលជាការទទួលខុសត្រូវសម្រាប់កិច្ចសហការជាមួយស្ថាប័នជាតិពាក់ព័ន្ធ។
ខែសីហា ឆ្នាំ២០០៣ ការិយាល័យបានចាប់ផ្តើមអនុវត្តគម្រោងថ្មីមួយ ឈ្មោះថា “កម្មវិធីសកម្មភាពជាតិបន្ស៊ាំនឹងការប្រែប្រួលអាកាសធាតុ” (NAPA) ដោយមានការគាំទ្រហិរញ្ញវត្ថុពី GEF តាមរយៈ UNDP។ គម្រោងនេះ មានគោលបំណងរៀបចំផែនការសកម្មភាពជាក់ស្តែងរបស់ប្រទេសក្នុងការដោះស្រាយតម្រូវការបន្ទាន់ និងភ្លាមៗ និងកង្វល់នានារបស់ប្រទេសដើម្បីបន្ស៊ាំនឹងការប្រែប្រួលអាកាសធាតុ។
ខែតុលា ឆ្នាំ២០០៣ វិទ្យាស្ថានយុទ្ធសាស្ត្របរិស្ថានសាកល (IGES) នៃប្រទេសជប៉ុន បានចាប់ផ្តើមអនុវត្តកម្មវិធីកសាងសមត្ថភាពCDM សម្រាប់បណ្តាប្រទេសក្នុងទ្វីបអាស៊ី រួមទាំងកម្ពុជា “ការពង្រឹងសមត្ថភាពចម្រុះសម្រាប់យន្តការអភិវឌ្ឍន៍ស្អាត(ICS-CDM)”។ គោលដៅរបស់គម្រោង ICS-CDM គឺដើម្បីឱ្យប្រទេសកំពុងអភិវឌ្ឍក្នុងតំបន់អាស៊ីនិងវិនិយោគិនពីប្រទេសជប៉ុន អាចចូលរួមពេញលេញក្នុងអនុវត្តគម្រោង CDM ដើម្បីរួមចំណែកដល់ការអភិវឌ្ឍប្រទេសម្ចាស់គម្រោង ដោយចីរភាព។ គម្រោង ICS-CDM ទទួលការឧបត្ថម្ភពីក្រសួងបរិស្ថាន នៃប្រទេសជប៉ុន (MoE-ជប៉ុន )។
នៅខែតុលា ឆ្នាំ២០០៩ ការិយាល័យប្រែប្រួលអាកាសធាតុត្រូវបានបង្កើតជានាយកដ្ឋានប្រែប្រួលអាកាសធាតុ ដូចមានចែងនៅក្នុងអនុក្រឹត្យលលេខ១៧៥ ចុះថ្ងៃទី១៤ តុលា ២០០៩។ នាយកដ្ឋានស្ថិតនៅក្រោមចំណុះអគ្គនាយកដ្ឋានរដ្ឋាបាលការពារនិងអភិរក្សធម្មជាតិ នៃក្រសួងបរិស្ថាន ដែលមានបេសកម្មរួមចំណែកដល់ការអភិវឌ្ឍនដោយចីរភាពក្រោមលក្ខខណ្ឌប្រែប្រួលអាកាសធាតុនិងគោរពតាមគោលនយោបាយរបស់រាជរដ្ឋាភិបាលកម្ពុជា។
នៅខែឧសភា ឆ្នាំ២០១៥ ឆ្លើយតបទៅនឹងកំណែរទំរង់រចនាសម្ព័ន្ធរបស់ក្រសួងបរិស្ថាន នាយកដ្ឋានប្រែប្រួលអាកាសធាតុត្រូវបានផ្លាសប្តូរឱ្យស្ថិតនៅក្រោមអគ្គលេខាធិកាដ្ឋានក្រុមប្រឹក្សាជាតិអភិវឌ្ឍន៍ដោយចីរភាព ដែលមានអាណត្តិលើកកម្ពស់ការអភិវឌ្ឍប្រកបដោយចីរភាពក្នុងន័យធានាលំនឹងសេដ្ឋកិច្ច បរិស្ថាន សង្គម និងវប្បធម៌នៅក្នុងព្រះរាជាណាចក្រកម្ពុជា