គម្រោង "ការអភិវឌ្ឍដែលបញ្ចេញកាបូនតិច ដើម្បីបង្កើនផលិតភាព និងកាត់បន្ថយការប្រែប្រួលអាកាស ធាតុ តាមរយៈការផ្ទេរបច្ចេកវិទ្យាអំណោយផលល្អដល់បរិស្ថាន" ឬហៅថា "គម្រោង TEST" ត្រូវបានអនុវត្តចាប់ពីឆ្នាំ២០១៨ ដល់ ឆ្នាំ២០២៣ ដោយមានការគាំទ្រផ្នែកហិរញ្ញវត្ថុពីមូលនិធិ Global Environment Facility និងត្រូវបានបញ្ចប់ដោយជោគជ័យ ក្នុងពិធីបិទបញ្ចប់គម្រោង ក្រោមអធិបតីភាព ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅថ្ងៃទី១៩ ខែធ្នូ ឆ្នាំ២០២៣។
ក្នុងគោលដៅធ្វើឱ្យវិស័យកម្មន្តសាលរបស់កម្ពុជាកាន់តែបៃតង តាមរយៈការប្រើប្រាស់វិធីសាស្រ្តរួមរបស់ TEST ដូចជាគោលការណ៍ប្រសិទ្ធភាពធនធាន និងផលិតកម្មស្អាត, ប្រព័ន្ធគ្រប់គ្រងបរិស្ថាន, និងគណនេយ្យគ្រប់គ្រងបរិស្ថាន គម្រោងនេះទទួលបានការសាទរចំពោះលទ្ធផលជាវិជ្ជមានលើវិស័យឧស្សាហកម្មរបស់កម្ពុជា។ ឯកឧត្តម ហែម វណ្ណឌី បានថ្លែងអំណរគុណចំពោះភាគីពាក់ព័ន្ធ ដោយទទួលស្គាល់តួនាទីដ៏សំខាន់របស់ក្រសួងទាំងពីរ និងអង្គការ UNIDO ក្នុងការសម្រេចបាននូវគោលដៅទាំងអស់របស់គម្រោង។
ឯកឧត្តមបានលើកឡើងថា៖ “គម្រោង TEST បានជួយដល់វិស័យឯកជន រោងចក្រ សហគ្រាស និងសិប្បកម្ម នៅក្នុងវិស័យកម្មន្តសាលនៃព្រះរាជាណាចក្រកម្ពុជា លើការពង្រឹងប្រសិទ្ធភាពធនធាននិងថាមពល, ការគ្រប់គ្រងបរិស្ថាន, ការបង្កើនផលិតភាពនិងគុណភាព, ដែលជាកាតាលីករ រួមចំណែកក្នុងការកាត់បន្ថយសំណល់និងផលប៉ះពាល់ដល់បរិស្ថាន, កាត់បន្ថយថ្លៃដើម ដើម្បីបង្កើនឱកាសបង្កើតនិងបង្កើនប្រាក់ចំណេញ និងបង្កើនភាពប្រកួតប្រជែង សម្រាប់ទីផ្សារក្នុងស្រុក, តំបន់ និងទីផ្សារអន្តរជាតិ។ ទាំងអស់នេះជាកត្តាដែលនាំឱ្យមានប្រសិទ្ធផលផ្នែកសេដ្ឋកិច្ច និងបរិស្ថានកាន់តែប្រសើរឡើងដល់រោងចក្រ, សហគ្រាស, និងសិប្បកម្ម។
ឯកឧត្តមក៏បានសង្កត់ធ្ងន់ពីសារៈសំខាន់នៃការបន្តប្រើប្រាស់ប្រព័ន្ធឧស្សាហកម្មបៃតង ដើម្បីបង្កើនផលិតភាព និងភាពប្រកួតប្រជែង ដោយបញ្ជាក់ថា គម្រោងក៏បានជួយអភិវឌ្ឍធនធានមនុស្សទាំងក្នុងស្ថាប័នរដ្ឋ និងវិស័យឯកជនទាក់ទងនឹងបច្ចេកវិទ្យា និងបរិស្ថាន ជារួមផងដែរ។
លោក សុខ ណារិន នាយកអង្គការ UNIDO ប្រចាំប្រទេសកម្ពុជា បានលើកឡើងពីភាពជោគជ័យរបស់គម្រោងក្នុងការកាត់បន្ថយហានិភ័យនៃការប្រែប្រួលអាកាសធាតុ តាមរយៈការប្រើប្រាស់បច្ចេកវិទ្យាអំណោយផលល្អដល់បរិស្ថាន។ លោកបានលើកឡើងថា៖ “ក្នុងរយៈពេលនៃការអនុវត្តគម្រោង រោងចក្រ-សហគ្រាសចំនួន៥៥ បានទទួលយកបច្ចេកវិជ្ជាស្អាតទៅអនុវត្ត ដែលបានកាត់បន្ថយការប្រើប្រាស់ទឹក វត្ថុធាតុដើម ធាតុចូលផលិតកកម្ម ក៏ដូចជាកាកសំណល់ ដោយសន្សំបានប្រមាណ១០លានដុល្លារអាមេរិកក្នុងមួយឆ្នាំ និងកាត់បន្ថយការបំភាយឧស្ម័នផ្ទះកញ្ចក់ចំនួន ៤០.០០០ តោនក្នុងមួយឆ្នាំ ស្របតាមការរួមចំណែករបស់ជាតិ។
លោកបានបន្ថែមថា គម្រោងមិនត្រឹមតែផ្តល់ផលចំណេញផ្នែកបរិស្ថានប៉ុណ្ណោះទេ តែថែមទាំងបានផ្តល់ផលវិជ្ជមានដល់កម្មករចំនួន ១៣០.០០០នាក់ នៅក្នុងរោងចក្រទាំង៥៥ដែលបានចូលរួមអនុវត្តគម្រោង ដោយបង្កើនភាពប្រកួតប្រជែង និងទាក់ទាញអ្នកទិញ តាមរយៈការអនុវត្តប្រកបដោយនិរន្តរភាព។
ឯកឧត្តម ហែម វណ្ណឌី បានជំរុញឱ្យបន្តកិច្ចសហប្រតិបត្តិការនេះ ដោយអំពាវនាវដល់ដៃគូជាតិ និងអន្តរជាតិ វិស័យសាធារណៈ និងជាពិសេសវិស័យឯកជន ឱ្យចាប់យកប្រព័ន្ធឧស្សាហកម្មបៃតង ដើម្បីកំណើន និងភាពប្រកួតប្រជែង ព្រមទាំងប្រែក្លាយកម្ពុជាឱ្យទៅជាប្រទេសដែលមានខឿនឧស្សាហកម្មបៃតង មាននិរន្តរភាព និងបរិយាប័ន្ន។
ប្រភព៖ https://www.misti.gov.kh/page/index?article=success-of-test-project-paves-way-for-green-manufacturing-in-cambodia.html
