នាព្រឹកថ្ងៃចន្ទ ១១កើត ខែអស្សុជ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៨ ខែកញ្ញា ឆ្នាំ២០២០ នៅសណ្ឋាគារកាំបូឌីយ៉ាណា រាជធានីភ្នំពេញ នាយកដ្ឋានប្រែប្រួលអាកាសធាតុនៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព​ ដោយមានការគាំទ្រពីកម្មវិធីសម្ព័ន្ធភាពប្រែប្រួលអាកាសធាតុ (CCCA) បានរៀបចំកិច្ចប្រជុំក្រុមការងារបច្ចេកទេសប្រែប្រួលអាកាសធាតុ និងដៃគូអភិវឌ្ឍន៍ «ការផ្តល់សុពលភាពលើរបាយការណ៍ការចូលរួមចំណែករបស់ជាតិ ដើម្បីអនុវត្ដអនុសញ្ញាក្របខ័ណ្ឌសហប្រជាជាតិស្ដីពីការប្រែប្រួលអាកាសធាតុ» ក្រោមអធិបតីភាព ឯកឧត្តម ទិន ពន្លក អនុប្រធានទី២ ក្រុមប្រឹក្សាជាតិអភិវឌ្ឍន៍ដោយចីភាព និងជារដ្ឋលេខាធិការក្រសួងបរិស្ថាន តំណាងដ៏ខ្ពង់ខ្ពស់ឯកឧត្តម សាយ សំអាល់ ប្រធានក្រុមប្រឹក្សាជាតិអភិវឌ្ឍន៍ដោយចីភាព និងជារដ្ឋមន្រ្តីក្រសួងបរិស្ថាន​ និងដោយមានការចូលរួមពីឯកឧត្តម ថ្នាក់ដឹកនាំក្រសួង ស្ថាប័នពាក់ព័ន្ធ លោក លោកស្រី ជាសមាជិកក្រុមការងារបច្ចេកទេសប្រែប្រួលអាកាសធាតុ តំណាងទូត ដៃគូអភិវឌ្ឍន៍ សង្គមស៊ីវិល វិស័យឯកជន ស្ថាប័នសិក្សា និងអ្នកពាក់ព័ន្ធផ្សេងៗចំនួនប្រមាណ ៧៩នាក់ (ស្រី ២២នាក់)។ 

កិច្ចប្រជុំនេះរៀបចំឡើងក្នុងគោលបំណង៖ ១) បង្ហាញពីរបាយការណ៍ការចូលរួមចំណែករបស់ជាតិ ដើម្បីអនុវត្ដអនុសញ្ញាក្របខ័ណ្ឌសហប្រជាជាតិស្ដីពីការប្រែប្រួលអាកាសធាតុរបស់កម្ពុជា (Nationally Determined Contribution-NDC Update)  ២) ស្វែងរកការបញ្ជាក់អះអាង ការផ្ទៀងផ្ទាត់ និងការឯកភាពលើលទ្ធផលនៃការធ្វើសារពើភណ្ឌឧស្ម័នផ្ទះកញ្ចក់ និងការស្នើឡើងនូវសកម្មភាពកាត់បន្ថយព្រមទាំងវិធានការបន្ស៊ាំនានា និង៣)ផ្តល់សុពលភាពសេចក្តីព្រាងរបាយការណ៍ការចូលរួមចំណែករបស់ជាតិដើម្បីអនុវត្ដអនុសញ្ញាក្របខ័ណ្ឌសហប្រជាជាតិស្ដីពីការប្រែប្រួលអាកាសធាតុរបស់កម្ពុជា។

ឯកឧត្តម ទិន ពន្លក បានមានប្រសាសន៍ថា ការប្រែប្រួលអាកាសធាតុ ជាបញ្ហាប្រឈមមួយសម្រាប់ពិភពលោក ជាពិសេសប្រទេសកំពុងអភិវឌ្ឍន៍ដែលមានការអភិវឌ្ឍតិចតួច ដូចជាប្រទេសកម្ពុជា ដោយសមត្ថភាពបន្ស៊ាំ និងបច្ចេកទេសនៅមានកម្រិតដើម្បីឆ្លើយតបទៅនឹងការប្រែប្រួលអាកាសធាតុ។ ឯកឧត្តមបានបន្ថែមទៀតថា  ផ្អែកលើកិច្ចព្រមព្រៀងទីក្រុងប៉ារីស​ស្តីពី ​អាកាសធាតុ​ឆ្នាំ​២០១៥  ប្រទេសកម្ពុជា និ​ង​សហគមន៍​អន្តរជាតិ បានឯកភាពរក្សាឱ្យបានការកើន​ឡើង​សីតុណ្ហភាពមធ្យម​សកល​​​​នៅក្រោម ២0C លើកម្រិត​មុន​បដិវត្តន៍​ឧស្សាហកម្ម និងបន្តកិច្ចប្រឹងប្រែងដើម្បី​កម្រិតការ​កើនឡើង​សីតុណ្ហភាព​មធ្យមសកល​នៅ​ក្រោម ១,៥0C ដោយផ្តោតលើការកាត់បន្ថយហានិភ័យ និងផលប៉ះពាល់​ពី​ការប្រែប្រួលអាកាសធាតុ និង​ការអភិវឌ្ឍ​ដែល​បញ្ចេញឧស្ម័នផ្ទះកញ្ចក់តិច។ ហេតុដូចនេះ ប្រទេសនីមួយៗ ត្រូវរៀបចំរបាយការណ៍បច្ចុប្បន្ន​ភាព NDC ដាក់ជូនទៅលេខាធិការដ្ឋានអនុសញ្ញាក្របខ័ណ្ឌសហប្រជាជាតិស្តីពី ការប្រែប្រួលអាកាសធាតុ រៀង​រាល់​៥ឆ្នាំម្តង។​  តាម​រយៈ​របាយការណ៍NDCលើកទី២នេះ គិតត្រឹមឆ្នាំ២០៣០​ ប្រទេសកម្ពុជា នឹងចូលរួមចំណែកកាត់បន្ថយឧស្ម័នផ្ទះកញ្ចាក់ចំនួនប្រមាណ៣៧%​ (កើនឡើងចំនួន ៣៩%​​ បើប្រៀធៀបជាមួយរបាយការណ៍NDC​លើកទី១ ដែល​បានដាក់ជូនទៅលេខាធិការដ្ឋានអនុសញ្ញាក្របខ័ណ្ឌសហប្រជាជាតិស្តីពីការប្រែប្រួលអាកាសធាតុនៅឆ្នាំ២០១៥)​។ របាយការណ៍ NDCលើកទី២នេះ មិនគ្រាន់តែបង្ហាញអំពីជំហររបស់ប្រទេសកម្ពុជា​​ ក្នុងការចូលរួមជាមួយសហគមន៍​អន្តរជាតិ​​​ដើម្បី​​កាត់បន្ថយឧស្ម័នផ្ទះកញ្ចក់ និងបង្កើន​សកម្មភាពបន្ស៊ាំទៅ​នឹងការប្រែប្រួលអាកាស​ធាតុតែ​ប៉ុណ្ណោះ​ទេ ប៉ុន្តែថែមទាំងបង្ហាញនូវគោលនយោបាយ និងសកម្មភាពទាំងនេះ បានចូលរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចសង្គមប្រកបដោយចីរភាព តាមរយៈកម្មវិធី/គម្រោងដូចជា​​​​​​ គម្រោង REDD+ និងថាមពលកកើតឡើងវិញជាដើម។ ឯកឧត្តម បានកោតសរសើរ និងអរគុណ​ដល់​ក្រសួងស្ថាប័ន​ពាក់ព័ន្ធ ក្រុមការងារបច្ចេកទេសប្រែប្រួលអាកាសធាតុ និងដៃគូអភិវឌ្ឍន៍ដូចជា (UNDP, World​​​​ Bank, FAO, UNICEF, GGGI, UN Women ។ល។) ដែលចូលរួមរៀបចំរបាយការណ៍ក្នុងការផ្តល់សុពលភាពដ៏មានសារៈ​សំខាន់​នេះ​ឱ្យ​លេច​ជារូបរាងឡើង និងពិនិត្យផ្តល់យោបល់លើសកម្មភាពអាទិភាពនៃផ្នែកនិងវិស័យនីមួយៗ ដើម្បីឱ្យសម្រេចបានផែនការមុនពេលសន្និ​សីទកំពូល​លើកទី២៦នៃអនុសញ្ញា​ក្របខ័ណ្ឌសហប្រជាជាតិស្តីពីការប្រែប្រួល​អា​កាស​ធាតុ (COP26) ឆ្នាំ២០២១​ នៅប្រទេសអង់គ្លេស។​

កម្រងរូបថត៖ http://ncsd.moe.gov.kh/kh/resources/album/meeting-cctwg-dps-validation-ndc