នៅ​ព្រឹកថ្ងៃទី១២ ខែមិថុនា ឆ្នាំ២០២០ ឯកឧត្តម ទិន ពន្លក អគ្គលេខាធិការ​នៃ​អគ្គលេខាធិការដ្ឋាន​ក្រុមប្រឹក្សា​ជាតិ​អភិវឌ្ឍន៍​ដោយ​ចីរភាព និងជាប្រធានក្រុមការងារបច្ចេកទេស បានដឹកនាំកិច្ចប្រជុំក្រុមការងារបច្ចេកទេសពិគ្រោះយោបល់លើការរៀបចំប្លង់ និង​ផែនការ​មេ​របស់មជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន លើកទី២ នៅ​បន្ទប់ប្រជុំត្រដក់ធំ ទីស្ដីការ​ក្រសួងបរិស្ថាន។

កិច្ចប្រជុំនេះរៀបចំឡើងដោយនាយកដ្ឋានជីវៈចម្រុះនៃ អ.ក.អ.ច. ដោយ​មាន​ការចូលរួម​ពី​សមាជិក​ក្រុមការងារ​បច្ចេកទេស​ដែល​មាន​សមាសភាពមកពីអគ្គលេខាធិការដ្ឋាន ក.ជ.អ.ច. អគ្គនាយកដ្ឋានចំណេះដឹង និងព័ត៌មានបរិស្ថាន អគ្គនាយកដ្ឋាន​សហគមន៍​​មូលដ្ឋាន អគ្គនាយកដ្ឋានរដ្ឋបាលការពារនិងអភិរក្សធម្មជាតិ តំណាងរដ្ឋបាលខេត្តសៀមរាប រដ្ឋបាលស្រុកបន្ទាយស្រី អាជ្ញាធរ​ជាតិអប្សរា មន្ទីរបរិស្ថានខេត្តសៀមរាប និងអ្នកពាក់ព័ន្ធដែលមានសមាជិកចូលរួមសរុបចំនួន២០រូប។

គោលបំណង​នៃកិច្ចប្រជុំនេះគឺដើម្បី ៖ ១) ពិនិត្យ និងផ្តល់យោបល់លើព្រំប្រទល់មជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន ២) កំណត់យន្តការរៀបចំព្រំប្រទល់ជុំវិញមជ្ឈមណ្ឌល និង ៣) កំណត់​យន្តការ​ដោះស្រាយ​ការតាំង​លំនៅ​ដ្ឋាន និង​អាស្រ័យផលរបស់ប្រជាជននៅក្នុងមជ្ឈមណ្ឌល។

តាមរយៈកិច្ចប្រជុំនេះ ក្រុមការងារបច្ចេកទេសបានពិនិត្យលើវឌ្ឍនភាពនៃការរៀបចំមជ្ឈមណ្ឌល និង​បានពិភាក្សា​និង​ឯកភាព​លើ​ចំណុចសំខាន់ៗរួមមាន៖ ១) ឯកភាពលើផែនទីរបស់មជ្ឈមណ្ឌលទំហំ២០២០ហិកតា ដែលបានកំណត់ ២) ឯកភាព​លើ​គម្រោង​រៀបចំព្រំប្រទល់ជុំវិញមជ្ឈមណ្ឌល ដោយ​នឹង​សហការ​ជាមួយ​អ្នកពាក់ព័ន្ធ​ក្នុង​ការកំណត់​យន្តការ​និង​បោះ​បង្គោល​ព្រំ​ប្រទល់​មជ្ឈមណ្ឌល  ៣) ឯកភាព​ធ្វើការ​ចុះ​ស្រង់ស្ថិតិចំនួនប្រជាពលរដ្ឋតាំងលំនៅដ្ឋាននិងអាស្រ័យផលជាក់ស្តែងក្នុងទីតាំង មជ្ឈមណ្ឌល ដើម្បីរៀបចំយន្តការដោះស្រាយ និង៤) បានធ្វើបច្ចុប្បន្នភាពបញ្ជីផែនការសាងសង់អគារ និង​ហេដ្ឋារចនាសម្ព័ន្ធ​របស់​មជ្ឈមណ្ឌល​ផងដែរ៕