រាជធានីភ្នំពេញ៖ នាយកដ្ឋានជីវៈចម្រុះនៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព (ក.ជ.អ.ច.) នៅថ្ងៃ ទី១០ ខែកុម្ភៈ ឆ្នាំ២០២០ បានរៀបចំវេទិកាកេសរកូលលើកទី១ នៅកម្ពុជា និងពិធីចុះហត្ថលេខាលើ អនុស្សរណៈយោគយល់ស្តីពីកិច្ចសហប្រតិបត្តិការរវាងអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ ដោយចីរភាព-ក្រសួងបរិស្ថាន និងសារមន្ទីរប្រវត្តិសាស្រ្តធម្មជាតិទីក្រុងប៉ារីស នៅទីស្ដីការក្រសួងបរិស្ថាន។
ពិធីនេះរៀបចំឡើងក្រោមអធិបតីភាពឯកឧត្ដម អ៊ាង សុផល្លែត រដ្ឋលេខាធិការក្រសួងបរិស្ថាន និងជា តំណាងដ៏ខ្ពង់ខ្ពស់ ឯកឧត្តម សាយ សំអាល់ ប្រធាន ក.ជ.អ.ច. និងជារដ្ឋមន្ត្រីក្រសួងបរិស្ថាន ដោយ មានការអញ្ជើញចូលរួមពីតំណាងក្រសួង ស្ថាប័ន ស្ថានទូត អង្គការដៃគូ វិស័យឯកជន អ្នកជំនាញជាតិ និងអន្តរជាតិ សាធារណជន សិស្ស និស្សិត និងអ្នកពាក់ព័ន្ធប្រមាណ៥០០នាក់។
វេទិកាកេសរកូលរៀបចំឡើងក្នុងគោលបំណង ៖ ១. បំផុសគំនិតសាធារណជនឱ្យស្រឡាញ់ និងអភិរក្ស កេសរកូល ២. ពង្រឹងភាពជាដៃគូ និងផ្សារភ្ជាប់បណ្ដាញអ្នកសិក្សាស្រាវជ្រាវ កេសរកូលនៅកម្ពុជា ៣. លើកកម្ពស់ជីវភាពប្រជាពលរដ្ឋ តាមរយៈទេសចរណ៍ ធម្មជាតិ និងកម្មវិធីនានា របស់មជ្ឈមណ្ឌល ស្រាវជ្រាវ និងអភិរក្សកេសរកូល សុខ អាន ភ្នំគូលែន។
.jpg)
សូមជម្រាបផងដែរថា ក្រុមនិស្សិត និងសាធារណជន ក៏បានចូលរួមទស្សនា និងស្ដាប់ការបង្ហាញពីការ អនុវត្តការងាររបស់ក្រុមប្រឹក្សាជាតិអភិវឌ្ឍន៍ដោយចីរភាពនៅលើជញ្ជាំង (Corridor) ផងដែរ៕
